O Campus Universitario de Melilla, pertencente á Universidad de Granada (UGR), é o escenario das II Xornadas Nacionais de Campus Periféricos, que se celebran este martes 27 e mércores 28 de outubro. O evento reúne na cidade autónoma a representantes de 19 universidades españolas, entre elas as tres públicas galegas: a Universidade de Santiago de Compostela (USC), a Universidade de Vigo (UVigo) e a Universidade da Coruña (UDC).
O obxectivo principal destas xornadas é compartir experiencias, identificar problemas comúns, dar visibilidade ás boas prácticas e contribuír á construción dunha alianza de campus periféricos. Búscase situar esta realidade na axenda estratéxica do sistema universitario español. Esta segunda edición dá continuidade ao encontro do ano pasado no Campus de Ponferrada, organizado pola Universidad de León, e busca avanzar no diagnóstico dos desafíos compartidos e na elaboración de propostas conxuntas.
A representación das universidades públicas galegas está integrada pola vicerreitora do Campus de Ferrol, Igualdade e Responsabilidade Social da UDC, Ana Ares Pernas; polo vicerreitor de Profesorado e Innovación Docente da USC, Pablo Taboada Antelo; pola vicerreitora do Campus de Ourense da UVigo, María Montserrat Cruz González; polo director do Campus Auga, Alberto Vaquero García; e pola vicerreitora do Campus de Pontevedra da UVigo, Marián Fernández Villarino. Tamén asistiu o secretario xeral de Universidades, José Alberto Díez de Castro.
O Campus Industrial de Ferrol, da UDC, foi o primeiro campus en obter a acreditación como campus de especialización do Sistema Universitario de Galicia (SUG). En decembro de 2023 renovou o seu selo de excelencia por catro anos, un recoñecemento impulsado pola Xunta de Galicia para fortalecer os campus non centrais e favorecer a súa competitividade.
Desde a súa creación en 2015, o Campus Industrial de Ferrol céntrase en seis liñas estratéxicas: robótica industrial, materiais, optimización de procesos, enxeñaría naval e offshore, xestión industrial e desenvolvemento de produto. Os retos futuros inclúen a incorporación de novas liñas de investigación en enxeñaría eléctrica, electrónica, telecomunicacións e informática, así como liderar a investigación nacional en fabricación aditiva e industria 4.0.
