A Asociación de Industrias do Metal e Tecnoloxías Asociadas de Galicia (Asime) subliña que a implantación dunha fábrica do grupo automobilístico chinés SAIC no Porto Exterior de Ferrol, xunto cunha planta de compoñentes nas Pontes, representa un investimento "estratéxico" para a transformación do sector do automóbil.

Non obstante, a patronal do metal insta a abordar esta iniciativa cunha visión "global" do territorio, advertindo que a chegada de novas industrias debe integrarse cos sectores xa consolidados para evitar tensións no uso do solo industrial, infraestruturas ou na dispoñibilidade de talento. Reclaman unha planificación eficiente para un desenvolvemento equilibrado e a longo prazo.

A Iniciativa Empresarial do Noroeste por Europa (IEN) tamén celebrou a chegada do xigante chinés, felicitando ao novo presidente da Autoridade Portuaria de Ferrol, José Antonio Álvarez Vidal, e saudando a "positiva noticia" da nova fábrica. O presidente de IEN, Manuel Pérez, desexou un bo entendemento entre as concesionarias para facilitar a acollida da factoría, recoñecendo tamén o labor do anterior presidente, Francisco Barea.

Pola súa banda, o Clúster de Empresas de Automoción e Mobilidade de Galicia (Ceaga) saudou a implantación da factoría e reclamou oportunidades para a cadea de subministración galega. Destacan que o proxecto xerará máis actividade económica, emprego cualificado e novas oportunidades de negocio, cun potencial "efecto tractor" se se cumpren os volumes de produción previstos.

Ceaga considera fundamental que esta inversión xere oportunidades reais para as empresas galegas en ámbitos como compoñentes, enxeñaría, loxística ou servizos industriais avanzados, insistindo nunha competencia xusta e con contido local. Valoraron a importancia da colaboración público-privada e comprometeron o seu apoio para identificar provedores galegos e impulsar iniciativas de talento e innovación.