A conselleira de Vivenda e Planificación de Infraestruturas, María Martínez Allegue, anunciou hoxe a licitación destas obras, que completan a contratación das sete novas promocións neste ámbito residencial. A Xunta impulsa así a construción de 353 vivendas públicas na zona.
A nova promoción constará de tres bloques lineais de baixo e cinco plantas. As vivendas disporán de dous e tres dormitorios, e tres delas estarán adaptadas para persoas con mobilidade reducida. Ademais, a clasificación enerxética destas vivendas suporá unha mellora medioambiental e un aforro económico, e o conxunto incluirá unha zona verde de espazo común.
As empresas interesadas teñen de prazo para presentar as súas ofertas ata o vindeiro 15 de outubro.
A conselleira lembrou que esta licitación prodúcese pouco despois de anunciar a de outra promoción de 58 vivendas, o que evidencia o ritmo de traballo do Goberno galego para incrementar o parque público residencial. Allegue explicou que, das vivendas previstas no Bertón, algunhas xa están en construción, outras adxudicadas e comezarán en setembro, un bloque de 58 vivendas está en fase de valoración de ofertas, e o último bloque está en prazo de presentación de ofertas.
“"Actualmente, no ámbito do Bertón, hai 353 vivendas en distintas fases de execución, cun investimento comprometido que permitirá que sexan unha realidade no ano 2028."
Allegue subliñou o compromiso da Xunta co acceso á vivenda, cunha política clara e unha folla de ruta definida onde Ferrol é un obxectivo prioritario. Tamén se modificou a normativa para facilitar o acceso a máis familias, incrementando os límites de ingresos e establecendo cupos específicos por idades, incluíndo xente nova menor de 36 anos e persoas de entre 36 e 45 anos con fillos a cargo.
Finalmente, a conselleira destacou a importancia de incentivar a construción de vivenda, non só a través da promoción pública, senón tamén animando a promotores e cooperativas a construír para paliar as dificultades de acceso á vivenda entre todos.
