A Xunta de Galicia actualizou o Catálogo de Recursos Naturais de Galicia, sumando 65 novos produtos minerais á Materioteca de Galicia. O director xeral de Planificación Enerxética e Minas, Pablo Fernández Vila, destacou o traballo realizado pola Cámara Oficial Mineira de Galicia en colaboración co Inega para manter ao día este inventario.
Na xornada de difusión celebrada no CIS Ferrol, presentáronse mostras físicas de 36 destes novos elementos, como a mica, o magal ou a lousa rectangular verde. O catálogo alcanza xa os 190 produtos documentados, que se poden consultar na Materioteca, situada no propio CIS Ferrol.
Fernández Vila subliñou que esta iniciativa permitirá "reducir dependencias, fortalecer as cadeas de subministración, abrir oportunidades á nosa industria e xerar máis valor aquí, en Galicia". Tamén se analizaron novos usos para produtos e subprodutos minerais galegos e actualizouse o mapa de recursos, incluíndo unha sección de minerais estratéxicos.
O responsable do departamento de planificación Enerxética e Minas recalcou a importancia de que as administracións "lideren e sirvan de modelo na transición enerxética", lembrando que "non hai transición enerxética sen materiais e non hai materiais sen recursos minerais".




