O alcalde de Ferrol, José Manuel Rey Varela, presentou este martes os resultados da recente celebración xunto a representantes das confrarías e do sector hostaleiro. Durante o acto, celebrado no salón de recepcións, Rey Varela estivo acompañado pola concelleira de Turismo, Maica García; o presidente da Xunta de Confrarías e Irmandades da Semana Santa, Fernando Iguacel; e o presidente da Asociación de Empresarios de Hostalaría de Ferrol e comarca, Emilio Vázquez.
O rexedor ferrolán subliñou a importancia do traballo conxunto entre as administracións, as confrarías, os hostaleiros e os propios veciños para acadar este éxito. Tamén puxo en valor a campaña viral 'Toque Ferrol', que acumulou máis de 35.000 visualizacións, contribuíndo á promoción do evento.
“"Ferrol pode alcanzar o máis alto si traballamos unidos."
Durante os once días de actividade, dende o Venres de Dores ata o Domingo de Resurrección, a cidade acolleu a máis de 400.000 persoas. Este fluxo de visitantes mobilizou preto de 50 millóns de euros en sectores clave como a hostalaría, o comercio e o aloxamento. As oficinas de turismo atenderon a máis de 2.400 visitantes, dos cales máis de 1.000 pernoitaron na cidade. Entre as nacionalidades máis destacadas atopábanse Italia, Arxentina, Alemaña, o Reino Unido e os Estados Unidos.
A ocupación hoteleira acadou o 100% nos días centrais da Semana Santa, mentres que os aparcadoiros disuasorios foron utilizados por máis de 4.000 persoas. As visitas guiadas a espazos emblemáticos como o Arsenal, o Castelo de San Felipe ou o barrio da Magdalena rexistraron unha ocupación do 97%, con máis de 500 participantes.
