Este domingo 26 de abril, a XXIX Feira da Plantación de San Sadurniño converterase nun punto de encontro para os amantes das plantas, as flores, a artesanía e os produtos de tempada, ademais de ofrecer un completo programa de actividades para todas as idades.

Entre as propostas máis destacadas atópase a iniciativa de interpretación ambiental “En busca dos segredos de A Cortiña”, un xogo de pistas deseñado para que as familias descubran a riqueza natural e cultural da contorna do recinto feiral. Esta actividade, impulsada pola Cooperativa Rexenerando dentro do programa municipal “Terra de Vida”, promete unha experiencia participativa e educativa.

O percorrido guiado levará aos participantes por puntos emblemáticos como o paseo fluvial, o arboreto e a coñecida “Fraga Máxica”. A través destes enclaves, introducirase contido didáctico sobre biodiversidade, sustentabilidade e tradición popular, adaptado a un formato lúdico para o goce familiar. Para participar é necesaria inscrición previa, que se realizará media hora antes de cada quenda no posto do Concello. Haberá dúas sesións: unha matinal ás 12:30 horas e outra vespertina ás 17:30 horas, con capacidade para 20 persoas por grupo e unha duración de entre 60 e 90 minutos.

Ademais desta proposta educativa, a feira manterá a súa esencia festiva con demostracións de arte floral ás 11:00 e 16:30 horas, e sesións de cociña en directo con degustación a cargo do cociñeiro André Arzúa, enmarcadas no programa provincial “A Paisaxe que Sabe” (ás 11:30, 13:00 e 18:00 horas). Os asistentes tamén poderán gozar de degustacións de produtos locais de “A Fusquenlla”, visitar a exposición do Xeoparque do Cabo Ortegal “Unha mirada ás rochas que pisamos” e asistir á actuación itinerante do grupo Faíscas da Pontraga. A xornada completarase con sorteos de ramos e centros florais ás 14:00 e 19:45 horas e un espazo habilitado para comer.

Como antesala á gran cita do domingo, a área municipal de Igualdade organizou para a mañá do sábado un obradoiro dentro do programa “Tempos para”. A actividade consistirá nunha ruta para descubrir plantas comestibles e medicinais no paseo fluvial e xardíns municipais, seguida dunha sesión práctica sobre a súa preparación terapéutica e culinaria. A saída será ás 11:00 horas desde a Casa Consistorial, guiada por unha especialista local. Ofrécense 15 prazas que poden solicitarse por correo electrónico ou teléfono.