O Concello de Cedeira publicou na Plataforma de Contratación do Sector Público o expediente para a contratación das obras de creación dunha zona verde na rúa Silva, nunha parcela triangular das chamadas “Casas Baratas”. Esta actuación conta cun orzamento de 67.555,12€ (IVE incluído) e suporá a rexeneración dun recuncho actualmente degradado e desaproveitado, ofrecendo á veciñanza un espazo agradable para pasar o tempo, cun mobiliario urbano que proporcionará un refuxio contra o vento ou a choiva.
A intervención, financiada en parte polo POS+2024 da Deputación da Coruña (52,63% do custo), terá lugar nunha parcela de 73 metros cadrados situada a 100 metros do Auditorio Municipal. O fondo desta nova zona de lecer estará ocupado por un mural realizado pola artista Lidia Cao, que representa unha muller maior lendo un libro de forma xuvenil.
O proxecto inclúe a plantación de árbores e vexetación, a instalación dunha zona de bancos protexida cunha cuberta parcial, aparcadoiro de bicicletas e a renovación das beirarrúas para garantir a accesibilidade.
As empresas interesadas poderán presentar ofertas ata o 24 de novembro. O prazo de execución da obra será de tres meses.
