O Concello de Ares vén de completar as obras de mellora da eficiencia enerxética do alumeado público no núcleo de Cervás. A intervención, que contou cun investimento de 38.251,54 euros, financiado pola Xunta de Galicia e o propio Concello, ten como obxectivo modernizar a instalación, optimizar o consumo eléctrico e reducir a contaminación lumínica.
Os traballos incluíron a substitución das 29 luminarias existentes por novos equipos LED de alta eficiencia de 25 W, fronte ás anteriores lámpadas de vapor de sodio de alta presión de 70 W. Instaláronse 13 luminarias de tipo vial e 16 conxuntos de farol tipo vila. Tamén se renovaron tramos de cableado aéreo e subterráneo deteriorados, substituíronse caixas de derivación e rexistro e repúxose un poste de formigón de nove metros de altura.
Esta nova instalación permitirá acadar un aforro enerxético anual de 6.964,60 kWh, o que supón un 66,57 % do consumo anterior. Ademais, estímase que a intervención evitará a emisión de 2,49 toneladas de CO₂ ao ano. A tecnoloxía LED tamén contribúe a mellorar a eficiencia, reducir o mantemento e axustar os niveis lumínicos, favorecendo unha menor contaminación lumínica.
O investimento total do proxecto foi de 38.251,54 euros, dos cales 28.688,66 euros (75 %) foron achegados polo Fondo de Compensación Ambiental da Xunta de Galicia e os 9.562,88 euros restantes (25 %) polo Concello de Ares. A actuación enmárcase nas iniciativas municipais de modernización da rede de iluminación pública.
A concelleira de Urbanismo, Olimpia Marcos, destacou que estes traballos impulsan o obxectivo de contar cun alumeado público máis eficiente e sostible, lembrando intervencións previas no casco urbano de Ares e Redes, e noutros núcleos rurais.
