O Concello de Silleda vén de adxudicar á empresa Saídres de Trasdeza S.L. as obras de mellora dos centros sociais municipais de Cervaña, Ponte e Fiestras, por un importe total de 105.407,94 euros, IVE incluído. A Xunta de Goberno Local aprobou a adxudicación, que establece un prazo máximo de execución de dous meses.
Estas actuacións, enmarcadas nos programas municipais Silleda Dinamiza e Silleda Co-labora, buscan reforzar a rede de equipamentos sociais das parroquias, mellorando a súa condición de uso, accesibilidade e funcionalidade. O proxecto conta cunha axuda de 100.000 euros da Axencia Galega de Desenvolvemento Rural (Agader).
No Centro Social de Cervaña, as melloras inclúen limpeza de cuberta e fachadas, pintado, substitución do falso teito por PVC e renovación das carpinterías exteriores. Tamén se repararán elementos de madeira e a parrilla existente.
O Centro Social de Ponte non só será renovado, senón que tamén se adaptará unha parte como obradoiro comunitario para actividades agroalimentarias locais, dentro do programa Silleda Co-labora. Inclúense tamén reparacións na cuberta, impermeabilización e a ampliación da illa de reciclaxe cun compostador comunitario.
Finalmente, no Centro Social de Fiestras actuarase sobre a cuberta, executarase unha nova pavimentación exterior, renovaranse as barandillas e realizaranse reparacións interiores e de instalacións. A empresa adxudicataria tamén mellorará a marquesiña da entrada principal.
“"Con esta actuación seguimos avanzando na mellora dos equipamentos municipais das parroquias, que son espazos fundamentais para a vida social e comunitaria do noso rural. Ademais de renovar edificios que precisaban distintas actuacións de conservación, damos un paso máis incorporando novos servizos, como o obradoiro comunitario de Ponte, co que queremos abrir novas posibilidades para a dinamización económica e social das parroquias."
O Concello de Silleda reafirma así a súa aposta pola recuperación e mellora dos centros sociais rurais, sumándose ás actuacións xa realizadas en parroquias como Saídres, Lamela, Piñeiro, Moalde e Cira.
