A oferta deportiva municipal de Silleda para o presente curso xa está en marcha e inclúe unha variedade de disciplinas consolidadas, ademais de incorporar novas propostas para diferentes idades. As actividades desenvólvense en espazos como o pavillón César G. Fares, o pavillón do IES e do CEIP Plurilíngue de Silleda, o Centro Social de Silleda e o recinto da Feira Internacional de Galicia.
Entre as disciplinas ofertadas atópanse patinaxe, kung-fu, baloncesto, zumba fitness, zumba kids, esgrima e atletismo. Como novidade para a rapazada de Primaria, incorpórase o mini balonmán. Para o público adulto, o programa amplíase con dúas novas modalidades: bailes de salón e a actividade ReConecta, deseñada para o benestar físico e emocional a través do exercicio e a xestión psicoemocional.
A escola de patinaxe establece unha idade límite de iniciación para nenos e nenas nacidos en 2022, con prazas limitadas. Pola súa banda, en atletismo, impartido por Atletismo Deza, poderán participar nenos e nenas nacidos entre os anos 2021 e 2014.
As inscricións poden realizarse directamente no pavillón César G. Fares de Silleda, ou ben cubrindo o formulario dispoñible en liña e remitíndoo ao enderezo de correo electrónico info@silleda.gal. O Concello agradece a colaboración da Fundación Semana Verde, o IES Pintor Colmeiro, o CEIP de Silleda e os clubs deportivos locais como Atletismo Deza, Compostela Esgrima, Obradoiro CAB e Balonmán Lalín.
