O conselleiro de Educación, Ciencia, Universidades e FP, Román Rodríguez, destacou hoxe o papel formativo, musical e impulsor do talento novo que desenvolve o Clarinet Fest, unha iniciativa que se celebra en Lalín (Pontevedra) e que conta co apoio da Xunta. O festival reúne ata o próximo domingo a recoñecidos clarinetistas de nove países, pertencentes a orquestras e universidades de prestixio.
Este evento sitúa á capital do Deza nun referente musical internacional durante estes días. Ademais, xoga un papel importante na formación e fomento de novas vocacións e na promoción do talento mozo, segundo sinalou o conselleiro.
O programa do festival, que xa vai pola súa sétima edición, combina actividades formativas, clases maxistrais e obradoiros con concertos e recitais de piano e de jazz ao longo da semana. O sábado culminará co IV Concurso Internacional Galicia Clarinet Fest, destinado a promover o talento novo e a excelencia interpretativa.
