As probas darán comezo mañá sábado coas convocatorias para o corpo superior (A1), con 1.323 persoas para 59 prazas, e o corpo de xestión (A2), onde 1.851 aspirantes competirán por 40 prazas. O domingo, 6.745 opositores presentaranse á convocatoria do corpo administrativo (C1), que conta con 74 prazas, mentres que 6.359 aspirantes optarán ás 83 prazas do corpo auxiliar (C2).
Un operativo de aproximadamente 275 persoas velará polo correcto desenvolvemento e seguridade dos procesos selectivos. A Administración galega habilitou unha ambulancia no recinto feiral de Silleda para atender calquera incidencia.
Estas probas marcan o fin do primeiro exercicio para todos os procesos selectivos convocados no ano 2025, que ofertaron un total de 1.267 prazas en 30 procesos distintos.
A Consellería de Facenda e Administración Pública implementará novas medidas de vixilancia e control, incluíndo a detección de dispositivos electrónicos non permitidos mediante tecnoloxías non intrusivas como a radiofrecuencia ou campos electromagnéticos. Realizaranse controis periódicos durante os exames e nas saídas dos aseos, respectando sempre a dignidade e intimidade dos aspirantes.
A negativa a someterse ás comprobacións ou a detección de dispositivos prohibidos poderá levar á expulsión do exame e á anulación do exercicio. Non se permitirá a entrada con teléfonos móbiles, reloxos, cámaras, ou calquera outro dispositivo electrónico, agás adaptacións médicas xustificadas. A Xunta recomenda acudir unicamente co material estritamente necesario, como lapis e goma de borrar, xa que non haberá servizo de custodia.
A mera posesión de calquera dispositivo prohibido, estea acendido ou non, será causa de expulsión.
