A Romería da Virxe do Corpiño, recoñecida como Festa de Interese Turístico de Galicia, chega un ano máis para encher de devoción e festa a aldea do Corpiño, en Lalín. A celebración terá lugar os días 23 e 24 de xuño, combinando a parte relixiosa coas mellores orquestras e actividades organizadas pola Asociación Cultural e Veciñal O Refaixo.
Este ano, o Concello de Lalín tramitou unha subvención de 5.500 euros (4.000 da Xunta e 1.500 de Abanca) para financiar as actuacións musicais e a promoción da festa. Esta achega, recibida por primeira vez, permitirá reforzar a difusión dunha romaría que xa conta co apoio dos veciños da parroquia e de empresas colaboradoras.
A Asociación O Refaixo, liderada pola súa presidenta Alba Rivas Carral, retoma por segundo ano consecutivo a dimensión máis lúdica da festa, complementando a festividade relixiosa. A entidade, formada por catro membros, busca dar visibilidade á parroquia de Losón e ao Santuario do Corpiño, un referente cultural e relixioso en Galicia.
O día 23 de xuño comezará cun pasacalles do grupo A Carballeira de Cercio, que actuará durante a misa solemne e a procesión. Pola noite, haberá verbena coas orquestras Charleston Big Band e Grupo Eureka, sorteos e unha sesión de fogos artificiais ás 00.00 horas.
O día grande, o 24 de xuño, contarán coa participación da Asociación Cultural Xirandola e a Banda de Música de Vilatuxe na misa solemne, pasacalles e procesión. A banda ofrecerá un concerto ao finalizar a parte lúdica. Ambos os días haberá servizo de pulpería.
No ámbito relixioso, o Santuario do Corpiño, dirixido por José Criado, celebrará misas continuadas os días 23 e 24 de xuño. Do 15 ao 23 de xuño terá lugar a novena. O 28 de xuño, día da Consagración, haberá misas e a actuación do grupo Os Xuncos. A seguridade estará garantida por un operativo especial con Protección Civil, Garda Civil e membros da Cofradía.
