Esta iniciativa conxunta busca divulgar o fenómeno astronómico, que será comentado polo profesor José Ángel Docobo do Observatorio Ramón María Aller da USC. Ademais, os dous municipios ofrecerán unha retransmisión nocturna da chuvia de estrelas das Perseidas, cuxo pico anual tamén está previsto para esas datas, garantindo a calidade da sinal mediante conexión satélite.

A capital de Deza tamén acollerá o V Congreso de Astronomía Proam, que se celebrará do 8 ao 10 de maio. Este evento, coordinado pola Sociedade Española de Astronomía, atraerá a afeccionados de España, Portugal e Francia. A sesión inaugural, aberta a todo o público, terá lugar o venres 8 ás 19:00 h e incluirá unha conferencia de José Ángel Docobo sobre as figuras de Ramón María Aller e o Matemático Rodríguez.

O congreso incluirá observacións astronómicas en Rodelas, o lanzamento dun globo estratosférico para a toma de imaxes, obradoiros e charlas sobre astrofotografía avanzada, así como visitas guiadas á Casa Museo e Observatorio de Aller.

En canto ao eclipse, a observación conxunta levarase a cabo en lugares emblemáticos de cada localidade: o Altar do Sol de Alperiz en Lalín e a Praia das Catedrais en Ribadeo. En Lalín, prepararase un aparcadoiro, mentres que en Ribadeo haberá un dispositivo especial de tráfico para acceder ao areal. Ribadeo será o punto de Galicia con maior duración do eclipse total, e Lalín un dos poucos lugares de Pontevedra onde se observará de forma óptima.