O presidente da Deputación de Pontevedra, Luis López, destacou o papel de Lalín como "un dos quilómetro cero da eclipse" durante a presentación da programación cultural deseñada polo concello para o vindeiro 12 de agosto, coincidindo co fenómeno astronómico. Acompañado polo alcalde José Crespo e a directora de Turismo da Deputación, Romina Fernández, López agradeceu a implicación do concello na iniciativa provincial "Baixo o Ceo das Rías Baixas".
A colaboración provincial materializarase no financiamento do concerto que ofrecerán Fillas de Cassandra no Altar do Sol (Alperiz) a partir das 22:00 horas. Esta iniciativa busca converter o fenómeno astronómico nunha celebración que combine cultura, patrimonio e ocio, estendéndose por máis de sete horas en Alperiz.
López sinalou que Lalín, xunto coas Illas Atlánticas e o ceo de Fornelos de Montes e Oia, é un dos tres destinos Starlight da provincia. Lembrou que o produto turístico "Baixo o Ceo das Rías Baixas", impulsado en 2023, busca potenciar o interior da provincia e atraer novos públicos, fomentando o turismo rural e a prolongación da estadía dos visitantes.
A Deputación tamén avanza na obtención da certificación Starlight para os Castelos de Soutomaior e Sobroso e distribuíu 30.000 gafas homologadas para o visionado seguro da eclipse. A estratexia a longo prazo busca consolidar o astroturismo como unha oferta turística estable, especialmente no interior da provincia.
