A actuación, da Familia Bocaprier, está dirixida a todos os públicos e representarase na avenida Aviador Gumersindo Areán ás 20:30 horas.
O circuíto +Escénicas, unha iniciativa da institución provincial que apoia a programación de teatro e danza nos concellos de menos de 20.000 habitantes, conta cun orzamento de 204.000 euros este ano, o que supón un aumento do 36% respecto á súa primeira edición.
O Gran Cuarteto da Familia Bocaprier está formado por Félix Rodríguez, Olivier Cano, Lydia Botana e Óscar Prieto. Descríbense como unha estirpe de músicos de dubidoso prestixio internacional, criada entre todo tipo de instrumentos, que amenizará as rúas cun espectáculo itinerante que combina música balkan, ska, rumba, coreografías, cantos tribais e triviais.
A Deputación dá resposta cunha iniciativa que o sector profesional demandaba desde hai máis de 15 anos. O ciclo, que xa tivo éxito nas súas edicións anteriores, conta cun orzamento que medrou un 36% desde a súa posta en marcha. Cada concello puido solicitar ata cinco actuacións de teatro e danza do catálogo de +Escénicas, que inclúe máis de 600 propostas. A Deputación asume o 90% do custo nos concellos de menos de 5.000 habitantes, o 80% nos de entre 5.000 e 10.000, e o 70% nos de entre 10.000 e 20.000 habitantes. As funcións terán lugar ata o 31 de marzo de 2027.
