A Deputación de Pontevedra financiará ao 100% as obras de mellora da capa de rodaxe de camiños en varios puntos de Vila de Cruces. A Xunta de Goberno provincial aprobará este venres unha achega de preto de 240.000 euros, enmarcada no Plan +Provincia 2026-2027.
Estas actuacións, que buscan mellorar o firme e a conservación de nove viarios en mal estado, inclúen tarefas de limpeza, reparación de fochancas, pavimentación e a extensión dunha nova capa de aglomerado asfáltico. Os traballos abranguen parroquias como Toiriz (no lugar de Barrio), Camanzo (nos Camanceiros), Brandariz (en Pinlle), a zona mixta de Camanzo e Brandariz (camiño en Guieral-Pinlle), Piloño (camiños en Combarro e Cerdeiriñas) e Carbia (camiños nos lugares do Abollo, A Pena e Cobas).
A deputada provincial Belén Cachafeiro destacou que estes recursos provinciais dan resposta ás demandas dos concellos e melloran a calidade de vida da veciñanza. Sinalou que plans como o +Provincia impulsan actuacións relevantes para a mellora da vida dos veciños e veciñas.
