O lume, que se orixinou na noite do pasado xoves, mantivo activo un dispositivo de extinción ata que se logrou controlar ás 16.52 horas deste sábado. As estimacións provisionais apuntan a que a superficie afectada polo incendio forestal ascende a 60 hectáreas.
Para combater as lapas, mobilizouse un importante dispositivo que incluíu 18 axentes, 24 brigadas, 22 motobombas, tres pas, dous técnicos, ademais de tres avións e tres helicópteros, segundo os datos facilitados pola Consellería do Medio Rural.
Os medios de extinción traballaron intensamente na zona para conter a propagación do lume, que se iniciou na parroquia de Oleiros e que se mantivo activo ata a tarde deste sábado.
A Consellería do Medio Rural recorda á cidadanía a importancia de alertar sobre calquera incendio forestal chamando ao teléfono gratuíto 085 ou a través da aplicación móbil ALume.
