A alcaldesa de Santiago fixo un chamamento á veciñanza para que colabore na correcta xestión dos residuos voluminosos, como mobles ou electrodomésticos, co obxectivo de evitar a saturación das rúas. Esta iniciativa inclúe un reforzo do servizo de recollida por parte da concesionaria, Urbaser, e unha campaña informativa que comezou este mesmo venres.

Segundo os datos presentados, o 62% dos residuos voluminosos que se retiran da vía pública non contan cun aviso previo por parte dos seus propietarios. Para solicitar a recollida, os cidadáns poden contactar a través da web santiagosostible.gal ou do teléfono 981565469, onde se lles indicará o punto e a hora máis axeitada para depositar os obxectos.

Ademais, a alcaldesa lembrou que moitos electrodomésticos, colchóns ou pneumáticos xa son retirados pola propia empresa subministradora ao entregar un produto novo, un servizo que adoita estar incluído no prezo de compra. Instou a utilizar esta vía para evitar que estes obxectos acaben abandonados.

Os datos dos últimos dous anos reflicten un aumento significativo no depósito de residuos voluminosos xunto aos contedores, o que atrasa a súa retirada. A campaña de sensibilización, que terá unha duración de tres meses, centrarase na cidade histórica e no Ensanche, zonas con maior produción de residuos. Persoal técnico ambiental informará a particulares e negocios sobre as boas prácticas na separación e depósito do lixo, advertindo que as malas prácticas poden ser sancionadas tras tres avisos.

En Santiago, a media de residuos por habitante e ano é de 470 kg, fronte aos 349 kg da media de Galicia. Esta diferenza atribúese á poboación flotante (estudantes, traballadores e visitantes) que, aínda que non está censada, xera residuos. A cidade destaca positivamente na recollida selectiva, separando o 28,7% das fraccións para reciclaxe, fronte ao 16% da media do país. A recollida de residuos orgánicos é 32 veces superior á media galega, e a de envases lixeiros, vidro, papel, pilas e téxtil tamén supera amplamente a media.