As persoas participantes do programa Reencontros con Galicia 2026, que se aloxan na residencia do Carballiño, tiveron a oportunidade de visitar onte a cidade de Ourense. Durante a súa visita, percorreron os lugares máis emblemáticos da urbe, incluíndo As Burgas, a Praza Maior e a Catedral de San Martiño.
Na residencia de tempo libre do Carballiño, dependente da Xunta de Galicia, atópanse estes días a metade dos máis de 200 participantes desta edición do programa. Impulsado pola Secretaría Xeral da Emigración en colaboración coa Consellería de Política Social e Igualdade, os participantes chegaron a Galicia a semana pasada e permanecerán na comunidade ata o próximo sábado.
Os asistentes proceden de países como Arxentina, Brasil, Venezuela, Cuba, Uruguai e Perú. Trátase de residentes galegos no exterior maiores de 65 anos que regresan temporalmente a Galicia para reencontrarse coas súas raíces e visitar aos seus familiares.
