O SD Compostela afronta este domingo a última xornada do campionato de liga coa necesidade de gañar ao Viveiro en Cantarrana e agardar un tropezo do Arosa fronte ao Céltiga en A Lomba para acadar o ascenso directo. No caso de non logralo, o sorteo do playoff xa definiu o seu futuro, que se presenta esixente.

O club, consciente da importancia do encontro, anunciou que custeará o prezo das entradas para os abonados que decidan acompañar o equipo en Viveiro. As reservas pódense realizar ata o xoves ás 15:00 horas, tanto de forma presencial na oficina do club como por teléfono ou correo electrónico. A recollida das entradas será no propio día do partido en Cantarrana.

Se o Compostela remata en segunda posición, tería que superar dúas eliminatorias fronte a rivais do seu mesmo grupo, xogando os partidos de volta como local. Actualmente, enfrontaríase ao CD Estradense nas semifinais, mentres que Atlético Arteixo e Boiro disputarían a outra praza.

Unha vez superados estes obstáculos, chegaría o cruce definitivo polo ascenso, que se presenta especialmente complicado. O sorteo determinou que o representante galego se enfronte ao catalán, considerado un dos grupos máis competitivos da categoría. Ademais, o factor campo non favorecerá ao equipo galego, que deberá resolver a eliminatoria nun partido de volta fóra de Galicia.