O evento literario, que se prolongará ata o 10 de maio, abriu as súas portas cunha vintena de casetas e unha notable afluencia de público. A cerimonia de inauguración oficial contou cun pregón e discursos de representantes das administracións públicas.
“"Esta inauguración faise cunha alegría moi especial, baixo o nome e a memoria de Begoña Caamaño."
A pregoeira, amiga persoal da autora homenaxeada este ano polo Día das Letras Galegas, subliñou a importancia de Caamaño, quen presentou a súa obra Morgana en Esmelle nesta mesma feira no ano 2012. Destacou que a súa escrita “abriu camiños para pensar o mundo desde o feminismo, a ética e a beleza da lingua galega”.
Desde a Federación de Librarías de Galicia, unha representante salientou que as feiras do libro son puntos de encontro onde “a cidade latexa ao ritmo das historias”, e que a de Compostela entende a literatura “non só como cultura, senón tamén como identidade”. Engadiu que a figura de Begoña Caamaño é un “fío invisible, ou moi visible, que atravesa toda a feira”.
A alcaldesa de Santiago tamén fixo referencia á “especial” vinculación da cidade coa figura homenaxeada, resaltando a súa capacidade para crear “novos referentes femininos” na literatura e a importancia de fomentar a lectura en galego, especialmente entre a infancia.
O director xeral de Cultura, pola súa banda, destacou as máis de sesenta actividades programadas, que “dá mostra da relevancia” do evento, e o presidente da Deputación da Coruña reivindicou a lectura como “un acto de liberdade” e o papel das librarías de barrio.
O evento estivo amenizado pola Banda Municipal de Santiago e contou coa presenza de representantes da corporación local, que visitaron os postos e adquiriron diversos títulos.
