A xerente da Fundación Artesanía de Galicia, Elena Fabeiro, visitou hoxe o espazo dos Casares en San Cristovo de Mouricios (Chantada), onde finaliza o curso 'Queda a pegada'. A iniciativa, impartida pola artista Gloria García Lorca, a ceramista Loaira Pérez do obradoiro Raposiñas (A Pobra do Caramiñal) e a artesá Carola Carrot, especializada en construción, explorou técnicas populares e artesanais para o tratamento das paredes.
Organizado pola Fundación Artesanía de Galicia en colaboración coa Galería Vilaseco, o curso centrouse no esgrafiado como técnica de embelecemento e protección fronte á humidade e a erosión. Durante varios días, os participantes experimentaron con métodos antigos para aplicalos a linguaxes contemporáneas.
Gloria García Lorca, artista, poeta e tradutora, achegou a súa experiencia en escultura e cerámica. Loaira Pérez, ceramista, investiga a materialidade e os procesos técnicos, liderando o obradoiro Cerámica Raposiñas. Carola Carrot, artesá da construción, especialízase en revestimentos con materiais naturais como a cal e a arxila, traballando na recuperación de técnicas tradicionais.
A visita tamén serviu para recordar a nova liña de axudas da Xunta, dotada con 1 millón de euros, destinada a incentivar contratos formativos de aprendices en oficios tradicionais. Subvencionaranse contratos a xornada completa durante un mínimo de 12 meses en obradoiros inscritos en Artesanía de Galicia, cun prazo de solicitude aberto ata o 30 de setembro ou ata esgotar o crédito.
