O Concello de Valga mellora as infraestruturas da principal zona industrial do municipio coa instalación de 13 novas columnas de alumeado. A vía beneficiada é o tramo de estrada situado entre as instalacións do grupo ODL e o recinto da nova empresa Urovesa.
A intervención, que supuxo un investimento de 22.782,39 euros, consistiu no subministro e montaxe das luminarias, así como no tendido de case medio quilómetro de cableado. As obras foron executadas pola empresa SETGA e contaron cunha subvención da Consellería de Economía e Industria da Xunta de Galicia, destinada á mellora de infraestruturas en áreas industriais galegas.
Esta actuación enmárcase no obxectivo de dotar de infraestruturas de calidade e seguras aos accesos e vías interiores da zona industrial, co fin de facilitar o desenvolvemento empresarial e a circulación. A área de Campaña-O Carballiño é o principal complexo industrial de Valga, albergando grandes empresas que xeran un importante volume de mercadorías e mobilizan a uns 2.000 traballadores diariamente.
Hai unhas semanas, esta mesma zona norte do parque industrial tamén se beneficiou do asfaltado de varias vías, cun investimento próximo aos 143.000 euros, tamén financiado pola Consellería de Economía e Industria. O goberno local reafirma así o seu compromiso coa modernización dos servizos básicos.




