Esta decisión, publicada no Boletín Oficial do Estado (BOE) este martes, implica un procedemento máis longo e detallado que o trámite simplificado inicialmente previsto. A resolución xustifica a medida indicando que “non se poden descartar efectos adversos significativos sobre o medio ambiente e a poboación”.

O proxecto, impulsado por Pirotecnia do Salnés SL, localizarase en Lantaño, no concello de Portas. Abrangue tres parcelas contiguas cunha superficie total de 5.219 metros cadrados, onde se prevé a construción de varios edificios organizados en catro dependencias para unha actividade considerada “potencialmente perigosa”.

A localización da futura instalación atópase a uns 700 metros do núcleo urbano máis próximo, Cachal. Ademais, a autoestrada AP-9, unha das principais vías de comunicación da zona, sitúase a 570 metros do emprazamento proposto.