O presidente da Deputación de Pontevedra, Luis López, e o alcalde de Moraña, Jose Luis Gómez, asinaron hoxe no Pazo Provincial un convenio para a mellora dos espazos públicos e a creación dunha senda peonil no Lugar do Buelo. Esta achega, enmarcada na segunda convocatoria do Plan Provincia Extraordinaria, supón un investimento de 490.000€, dos cales a Deputación achega 417.800€ (o 85% do orzamento) e o Concello os 73.000€ restantes.
O proxecto busca mellorar a imaxe, a seguridade viaria e os servizos nunha zona rural próxima ao núcleo urbano de Santa Lucía. O mandatario provincial destacou que a iniciativa reflicte o espírito da Deputación de crear espazos onde poidan convivir peóns e vehículos, asegurando que a veciñanza terá melloras vivan onde vivan. O alcalde Jose Luis Gómez agradeceu o apoio da Deputación a concellos pequenos como o seu.
As obras comprenden a mellora do pavimento, a creación dunha senda peonil de 2,50 metros de ancho mínimo e unha calzada para dous carrís de circulación. Tamén se xeren dúas plataformas de prioridade peonil, se renovan as redes de pluviais e sumidoiros, e se instalará nova iluminación. O rexedor resumiu que se creará unha senda que conectará a rúa dos colexios co lugar do Buelo, onde tamén se axardinará unha praza.
Esta colaboración súmase aos 3,3 millóns de euros que o Concello de Moraña recibiu da Deputación nestes tres anos de mandato a través de distintos plans de cooperación, demostrando o compromiso provincial coa mellora da calidade de vida da veciñanza. O presidente Luis López citou outros proxectos como a mellora da Carballeira de Santa Lucía ou da estrada entre Mane e Rebón.
