A Deputación de Pontevedra destinará 180.000 euros á instalación de cunetas de seguridade e á execución de obras de mellora da drenaxe nas estradas que unen Cuntis con Cequeril e Alto da Cruz. A deputada de Infraestruturas, Belén Cachafeiro, visitou a contorna onde se desenvolverán as actuacións, que abranguen melloras en treitos que atravesan os núcleos de Louriña, Xinzo, Cequeril e A Casiña.
Na estrada EP-8402 entre Cuntis e Cequeril, a mellora concentrarase en varios treitos que atravesan Louriña, Xinzo e Cequeril, cunha lonxitude aproximada de 700 metros. O investimento para esta zona ascende a 140.000 euros e busca mellorar a drenaxe e a seguridade viaria coa construción de cunetas, a colocación de tubaxes, a execución de arquetas e o recrecido de pozos para previr filtracións e danos ao firme.
Belén Cachafeiro lembrou que xa se actuou con anterioridade nesta mesma estrada, en zonas como Cardecide, A Ermida, Xinzo e A Casiña, onde se investiron 250.000 euros en preto de dous quilómetros de cunetas de seguridade. Tamén se instalaron barreiras de seguridade por preto de 90.000 euros en 1,8 km na marxe dereita.
No que respecta á EP-8402 entre Cuntis e Alto da Cruz, o investimento é de 40.000 euros, dentro do acordo marco de cunetas de seguridade. As actuacións realizaranse en dous treitos que atravesan A Casiña, enfocándose na mellora da drenaxe e seguridade mediante a construción de cunetas, tubaxes e arquetas.
Ademais, Cachafeiro sinalou outras melloras na seguridade viaria en Cuntis, como as realizadas na estrada provincial EP-8404 entre Piñeiro e Arcos, cun investimento superior a medio millón de euros. Estas obras incluíron a reposición da capa de rodaxe, 1.840 metros de cunetas de seguridade e 280 m² de novas beirarrúas.
