A fundadora de La Penela, María Barallobre Tomé, foi unha das cinco persoas e entidades galardoadas coas Medallas Castelao 2026. O presidente da Xunta, Alfonso Rueda, anunciou os nomes dos distinguidos, entre os que se atopan o trompetista Esteban Batallán Cons, a científica Mar Capeáns Garrido, o atleta Adrián Ben e a Fundación Andrea. Segundo Rueda, os establecementos da galardoada "falan e moi ben da nosa gastronomía".
Esta distinción premia a traxectoria empresarial de Barallobre, quen tras case trinta anos como docente, fundou xunto á súa familia en 1989 un pequeno restaurante en Coirós. A empresaria, nai de catro fillos, compatibilizou durante anos a ensinanza coas tarefas do fogar e a xestión do negocio, chegando a preparar a comida pola noite para rematala pola mañá.
“"Asombrosa tortilla de Betanzos, a inesperada estrela da casa, que esconde debaixo da pel acolchada, un interior líquido e anaranxado con patacas que se derriten cunha delicadeza asombrosa."
A carne asada e, especialmente, a tortilla de Betanzos, convertéronse nos seus grandes emblemas. Este último prato, coñecido pola súa textura xugosa e a tradición da comarca brigantina, foi recoñecido en xaneiro de 2025 como primeiro embaixador da tortilla de Betanzos polo propio Concello da localidade. O xornalista francés Stephane Davet eloxiou en Le Monde a "asombrosa" tortilla, destacando o seu interior líquido e as patacas "que se derriten cunha delicadeza asombrosa".
O éxito do primeiro establecemento en Coirós permitiu a inauguración en 1992 dun segundo local na praza de María Pita na Coruña. Posteriormente, abríronse máis establecementos e o grupo diversificou o seu negocio á organización de celebracións. A expansión internacional comezou en 2006 con restaurantes en Madrid e continuou en cidades como Bogotá e París.
A cerimonia de entrega das Medallas Castelao celebrarase o vindeiro 28 de xuño, coincidindo co aniversario da aprobación do Estatuto de Autonomía de Galicia.
