As actuacións céntranse nun lume intencionado ocorrido no concello de Aranga e noutros tres sinistros provocados por imprudencias graves durante queimas agrícolas nas localidades de Vilasantar e Abegondo.

A primeira actuación orixinouse tras un incendio rexistrado o 30 de marzo na parroquia de Cambás, en Aranga. Tras a investigación, identificouse un home de 67 anos como presunto autor. Este individuo xa figuraba en rexistros policiais por feitos similares ocorridos hai anos na zona de Aranga e Irixoa.

A rápida detección do foco e a intervención dos medios de extinción evitaron que o lume, que afectou uns 800 metros cadrados de eucaliptos, acadase maiores dimensións, grazas tamén á colaboración cidadá e da administración local.

Ademais, investigáronse outros tres veciños de Vilasantar e Abegondo por imprudencia grave ao realizar queimas de restos vexetais sen autorización ou sen as medidas de seguridade obrigatorias, como a creación dunha devasa perimetral e a dispoñibilidade de medios de extinción.

Esta falta de control provocou que o lume se estendese fóra dos límites previstos, orixinando diversos incendios en Vilasantar, Abegondo e Betanzos durante abril. As dilixencias foron remitidas ao xulgado de garda de Betanzos.