A XXVII Feira Franca Medieval de Betanzos transformará o casco histórico nun gran escenario de recreación histórica. O evento contará con arredor de 140 artesáns, ademais de espectáculos, música, teatro e actividades continuas durante tres días.
A alcaldesa, María Barral, definiu a cita como "unha celebración da nosa historia, do noso patrimonio e da nosa identidade como cidade", destacando o seu impacto turístico e económico como "un dos referentes das feiras medievais de Galicia".
A pesar das máis de 350 solicitudes recibidas, só se atenderon 140 postos para manter a calidade e a seguridade no casco histórico. A apertura oficial será o venres 10 ás 21:00 coa entrada do Señor de Andrade.
A pregoeira será Elena Díaz Blanco, directora da Escola Municipal de Folclore (EMuF), en homenaxe aos seus corenta anos de implicación coa cultura das Mariñas.
Reviviranse escenas como a ‘Carreira de Bocois’, a ‘Batalla das Figueiras’, a ‘Revolución Irmandiña’ e a ‘Expulsión dos Leprosos’, xunto a danzas, torneos medievais, espectáculos de lume e cetraría, obradoiros e actividades infantís.
A alcaldesa agradeceu o traballo dos empregados municipais, corpos de seguridade, servizos de emerxencias, voluntariado e veciñanza para converter Betanzos nunha cidade medieval. Tamén se mantivo a prioridade na seguridade, descartando ampliar o mercado ou trasladar representacións.
Barral tamén reclamou á Xunta unha resposta para declarar Ben de Interese Cultural as Danzas Gremiais e o Globo de San Roque.
A seguridade reforzouse coa presenza da Policía Local e a Garda Civil. Colaboran empresas como Gadisa, Coca-Cola e Estrella Galicia. Os veciños tamén participan decorando rúas e vestindo traxes de época. Haberá un "punto violeta" na praza dos Irmáns García Naveira.
