En Culleredo, a praza Europa do Burgo acolleu máis de 60 postos de artigos artesanais como roupa, complementos, agasallos, bonecos e bixutería. A iniciativa, organizada pola Concellería de Cultura local, contou coa participación das agrupacións musicais Catalmibre e Ancoradoira. O alcalde, José Ramón Rioboo, destacou a alta participación e sinalou que o evento "pon en valor o talento dos artesáns".

Pola súa banda, en Paderne, o Goberno de Sergio Platas organizou unha xornada con pandeiretas e gaitas, ademais de entregar os premios do seu III Certame de Relato Curto. Na categoría xuvenil resultou gañador Daniel Izan Vázquez, mentres que na categoría xeral o premio recaeu en Rocío Cal. O alcalde agradeceu a ambos "o compromiso con Paderne, co idioma e coa literatura".

A localidade de Vilarmaior foi escenario da XXXVII edición da tradicional Feira do Tres. O evento presentou un mercado, exposicións florais e concursos de cans e cabalos, con diversas modalidades como andadura tradicional galega, raza pura galega e cabalos cruzados. Para concluír a xornada, Nayla Ferreiro ofreceu un espectáculo de doma que atraeu a numerosos asistentes.