A entidade ecoloxista sinala que a zona do río Mandeo e o río Mendo en Betanzos constitúe un "cinto verde" protexido pola Rede Natura 2000, cun gran potencial para a observación de aves. Destacan a presenza de especies protexidas como o picapeixe común, a rola brava, o moucho paleártico e o ouriolo europeo, cuxos hábitats inclúen a canle fluvial, o bosque de ribeira e as zonas asolagables.
Critican que o Plan Xeral de Ordenamento Municipal de Betanzos, que se someterá a votación o vindeiro 19 de maio, prevexa urbanizar parcialmente a antiga xunqueira do Carregal. Esta área, que historicamente foi unha zona húmida e de pastoreo, foi progresivamente recheada e urbanizada con naves industriais e instalacións deportivas, a pesar dos recorrentes asolagamentos do Mendo que demostran a súa non urbanizabilidade.
“"A mágoa é que ata os anos 50 existía tamén unha extensa xunqueira salobre flanqueando a vila polo seu lado oeste: o Carregal. Esa área, na que se segaba o xunco para estrar as cortes, e onde pacía o gando cabalar e vacún, foi progresivamente sepultado con recheos e urbanizado masivamente con naves industriais, instalacións deportivas e mesmo con algúns edificios pretendidamente «habitables»."
Paradoxalmente, o pleno de Betanzos aprobou por unanimidade a declaración da zona do Porto, O Carregal e río Mendo como "Área de Restauración Ecolóxica", o que podería atraer fondos europeos para a recuperación de ecosistemas. Con todo, mentres se redacta este informe, estase a cortar o bosque de ribeira urbano do Mendo, dentro da Rede Natura 2000, en plena época de cría de aves protexidas.
A organización fai un chamamento para unha protección efectiva das ribeiras dos ríos Mendo e Mandeo e para evitar a urbanización do Carregal, defendendo a necesidade de máis zonas verdes e biodiversas para a veciñanza de Betanzos.
