A Xunta de Galicia considera os Centros de Información á Muller (CIM) un modelo de rede pública de recursos esenciais para o acompañamento e asesoramento a todas as mulleres, segundo afirmou a directora xeral de Promoción da Igualdade, Eloína Ingerto, durante a súa visita ao CIM de Curtis.
Eloína Ingerto, que estivo acompañada polo alcalde Javier Caínzos, agradeceu a implicación das profesionais do CIM de Curtis e eloxiou o seu labor diario en colaboración cos servizos públicos do concello.
Actualmente, Galicia conta con 84 centros destas características que conforman unha importante rede de proximidade, aberta a todas as persoas e con equipos multidisciplinares. Estes recursos son fundamentais na promoción da igualdade e na loita contra a violencia de xénero, segundo explicou a directora xeral.
A Xunta de Galicia destina anualmente máis de cinco millóns de euros ao funcionamento e consolidación destes centros, co obxectivo de seguir chegando a todas as mulleres que o precisen e contribuír á rápida detección da violencia de xénero.
