A localidade de Teixeiro, en Curtis, acollerá este fin de semana, 24 e 25 de outubro, a XXVI edición da Exaltación dos Cogomelos. O alcalde, Javier Caínzos, destacou que o evento "chega á súa vixésimo sexta edición consolidada como a gran cita do outono no noso concello" e "pon en valor o traballo da hostalería e do comercio de Curtis e de Teixeiro".
A praza de España será o epicentro gastronómico, cunha carpa con zona de xantar e exposición de cogomelos. A Deputación da Coruña, a través do programa "A paisaxe que sabe", organizará catro showcookings no seu Espazo Gastro, dirixidos polos chefs Lolo Mosteiro e Paula Martínez, do restaurante A Artesa da Moza Crecha. A Asociación do Comercio de Teixeiro tamén celebrará a súa Feira do Comercio Local.
Unha ruta gastronómica percorrerá 19 establecementos hostaleiros de Teixeiro e Curtis. En Teixeiro participan O Noso Mesón, Qubik Bar, Bar Dylan, Mandaboca, O Raposo, Café-Bar Luma, Café-Bar MG, Restaurante Sabino e Perla do Muíño. En Curtis, a ruta inclúe a Parrillada Agarimo, Bar Mesía, Bar Eladio, Bar Quintanilla, Café-Bar Suizo, Restaurante Exprés, Cantina Estación, Cervecería D’Cao, Tapería Castiñeira e La Morena Bar.
O sábado comezará ás 10:00 cunha recollida de cogomelos guiada por expertos da Asociación Pan de Raposo. Ás 12:00 abrirá a feira do comercio local e ás 14:00 actuará o grupo Os Carecos. Pola tarde, ás 19:00, celebrarase a XIV Ruada de Teixeiro, organizada pola Asociación Cultural Faragulla, con foliadiña, foliada e sorteos.
O domingo, a feira abrirá ás 11:00 e o Espazo Gastro ofrecerá showcookings ás 11:30 e 12:30. Ás 13:30 actuará Asuntos Prohibidos. Ás 18:00, o Grupo de Pandeireteiras Xacarandaina presentará "O ar da música". A Feira do Comercio Local pechará ás 19:00 cos sorteos finais.
A organización corre a cargo do Concello de Curtis, coa colaboración da Deputación da Coruña, a Xunta de Galicia e Galicia Calidade.
