A formación nacionalista sinala unha "longa cadea de atrasos, informes desfavorables e solicitudes de prórroga" que manteñen paralizada esta infraestrutura. Segundo os documentos aos que fan referencia, o proxecto foi aprobado inicialmente en febreiro de 2022, cun investimento previsto de 86.478,55 €, financiado a través do POS+ Plan Único da Deputación da Coruña.
Desde a súa aprobación, o procedemento acumulou "múltiples requirimentos de corrección, informes desfavorables e modificacións técnicas", o que provocou un atraso na súa tramitación de máis de dous anos. A pesar de ser unha infraestrutura estratéxica que une o núcleo urbano coa praia de Soesto e forma parte do camiño do litoral, ademais de estar preto do Camiño dos Faros, o proxecto segue sen executarse.
“"O proxecto leva máis de catro anos sen executarse, malia contar con financiamento e autorizacións sectoriais."
Este atraso xera unha gran preocupación sobre a capacidade de xestión municipal e o risco de perder o financiamento público asignado, especialmente se os prazos continúan prorrogándose. Ademais, advirten que o custo da obra podería ser maior cando finalmente sexa licitada.
Por todo isto, os nacionalistas demandan "maior claridade" sobre o estado actual do expediente, os motivos que impediron o avance na contratación e garantías de que o proxecto non sufrirá máis demoras no futuro.
