As principais demandas céntranse nunha atención á diversidade que sexa efectiva e inmediata, solicitando os especialistas necesarios (PT, AL e Orientación) para garantir que a inclusión non quede só en palabras. Esta situación xa foi denunciada en centros como o IES Agra de Raíces de Cee ou o CEIP Bergantiños de Carballo.
“"A necesaria rebaixa de horas lectivas en Secundaria non pode camuflar un recorte de persoal. A rebaixa lectiva debe implicar máis profesorado nos centros, non unha perda de horas de presencialidade que desmantele os apoios e a calidade educativa."
Ademais, dende o inicio do curso, as asembleas veñen alertando sobre graves problemas estruturais que afectan a varios centros da zona, incluíndo o IES Fernando Blanco de Cee, o IES Eduardo Pondal de Ponteceso e diversos centros educativos en Zas.
Co lema «A comunidade educativa en loita polo ensino público», as mobilizacións buscan implicar a toda a sociedade da comarca, incluíndo familias, ANPAS e alumnado. En Carballo, a manifestación comezará ás 19:00 horas na Praza de Galicia e rematará na Praza do Concello, tras percorrer as rúas Vázquez de Parga e Desiderio Varela. Á mesma hora, as protestas terán lugar na Praza 8 de Marzo en Cee e na Praza da Vila en Muros.
“"Esta non é só unha loita laboral do profesorado, é a loita polo dereito do noso alumnado a recibir unha educación de calidade e con recursos suficientes."
