As máquinas xa operan na zona, aproveitando a baixamar para facilitar a dinámica das mareas. A intervención, que se prolongará dependendo das condicións meteorolóxicas e marítimas, busca restaurar a funcionalidade da canle estuarina.
A primeira fase dos traballos consistirá en rebaixar a acumulación de area para crear unha pendente que axude á saída da auga. Posteriormente, ampliarase a apertura da canle ata acadar a profundidade desexada para un fluxo gradual entre a lagoa e o océano.
Durante a execución, adoptaranse as medidas de seguridade necesarias e limitarase o uso da maquinaria ás áreas estritamente requiridas, co fin de minimizar o impacto sobre os hábitats e as especies protexidas presentes neste espazo natural.
Esta actuación desprégase tras a sinatura dun protocolo entre as consellerías de Medio Ambiente e Cambio Climático e do Mar, xunto co Concello de Carballo. O acordo busca corrixir a situación hidroecolóxica actual e definir unha solución sostible para a conservación futura da Marismas de Baldaio, integrada na Rede Natura 2000.
A Consellería do Mar achega os medios materiais para estas accións inmediatas, mentres que a Consellería de Medio Ambiente coordina e autoriza as tarefas. O Concello de Carballo comprométese a colaborar logisticamente e a facilitar o desenvolvemento dos traballos.
A iniciativa responde á necesidade de abordar a deterioración ambiental na zona húmida debido ao peche reiterado da canle co mar. Isto dificulta a renovación da auga, favorece episodios de anoxia e eleva a temperatura, prexudicando hábitats, especies e a actividade marisqueira.
Ademais das actuacións urxentes, prevese un plan a longo prazo cunha comisión técnica de seguimento. Este plan integral definirá as intervencións necesarias para garantir a conservación dos hábitats, asegurar os aproveitamentos marisqueiros tradicionais e promover un uso sustentable deste espazo natural.
