O director de Turismo de Galicia, Xosé Merelles, e a directora xeral de Desenvolvemento Pesqueiro, Ángeles Vázquez, asistiron este luns á tradicional recreación do Naufraxio, unha das celebracións máis singulares da Costa da Morte e declarada Festa de Galicia de Interese Turístico, que se celebra no marco das festas locais de Laxe.
Xosé Merelles sinalou o valor destas tradicións como un reclamo turístico de primeira magnitude, xa que permiten aos visitantes achegarse á identidade, á cultura mariñeira e ás raíces da Costa da Morte. Pola súa banda, Ángeles Vázquez puxo en valor a forte vinculación da celebración co mar e coa memoria das comunidades pesqueiras.
Esta celebración ten lugar nun momento de notable crecemento turístico no xeodestino Costa da Morte. Ata xuño deste ano, os establecementos hoteleiros rexistraron 63.419 viaxeiros, o que supón un incremento do 16,9% respecto ao mesmo período de 2025, e 122.482 noites, un 12,3% máis. O turismo internacional experimentou un crecemento especialmente significativo, cun aumento do 22,9% en viaxeiros, mentres que o mercado nacional se incrementou nun 14%.
Para a Xunta, estes datos confirman o gran potencial dun destino que atopa nas súas festas, no seu patrimonio e na cultura mariñeira elementos diferenciais clave para seguir atraendo visitantes tanto nacionais como internacionais.
