O Concello de A Laracha prepara unha transformación radical da súa Casa Consistorial, un edificio que mantén a súa estrutura orixinal dende a súa construción en 1974. O proxecto, que acaba de saír a licitación, non se limita a un simple mantemento, senón que busca unha renovación completa baixo os principios da “Nova Bauhaus Europea”.

Un dos puntos clave da reforma é a mellora da accesibilidade. Actualmente, o acceso para persoas con mobilidade reducida é lateral e considerado “pouco inclusivo”. Coas novas obras, establecerase un único acceso pola fachada principal, garantindo que todos os cidadáns poidan entrar polo mesmo lugar a un vestíbulo que distribuirá o fluxo cara ao Rexistro e o novo Xulgado de Paz.

A parte máis visible da remodelación será a creación dunha nova planta ático, que substituirá o antigo tellado. Esta nova estrutura funcionará como un “faro institucional” e un mirador cara á praza, ofrecendo un espazo para recepcións e vodas, ademais de ampliar o aforo do Salón de Plenos para que máis veciños poidan asistir ás sesións.

Ademais das melloras estéticas e funcionais, o proxecto inclúe medidas de eficiencia enerxética. Instalarase un blindaxe anti-radón e sistemas de ventilación mecánica con recuperación de calor, o que permitirá reducir máis dun 30% o consumo de enerxía primaria non renovable e asegurar a chegada de fondos europeos Next Generation.

A reforma tamén se estenderá ao exterior, convertendo a Praza do Concello nun “hub” de mobilidade e convivencia. O actual parque infantil será substituído por unha zona de xogos moderna e segura, e integrarase unha parada para o transporte escolar e puntos de recarga para vehículos eléctricos, eliminando barreiras visuais para que a praza sexa unha extensión do edificio municipal.