A xornada do xoves 1 de outubro arranca coa presentación de Ninguén tira fotos nos enterros, de Carlota e Compañía, dentro do ciclo OTNI (Obxecto Teatral Non Identificado). A obra, que naceu no Certame Micro-Escena M² do festival, aborda a morte desde a mirada dunha nena de 11 anos, recreando fotografías en vivo e efectos analóxicos para construír un universo entre a memoria, a perda e a despedida. A estrea desta versión de gran formato marca o debut da compañía liderada por Carlota Mosquera.
A inauguración da exposición ‘Zoom FIOT 2025’ terá lugar o xoves 1 de outubro, ás 19.30h, no Pazo da Cultura. Mentres tanto, o sábado 3 de outubro, ás 18.00 horas, haberá un ‘Café con…’ no Salón da TV do Pazo para conversar co equipo de Chévere antes da función.
O sábado 3, o Programa de Sala do festival botará a andar coa estrea de ICTUS (anatomía de “A derradeira leición” de Castelao), a última creación de Chévere. A peza, que se presenta ás 20.00 horas no Auditorio do Pazo da Cultura, é un teatro documental que explora a relación entre a memoria persoal e colectiva a partir do emblemático cadro de Castelao, incorporando medidas de accesibilidade como lingua de signos e audiodescrición.
A programación complétase con propostas de circo contemporáneo, narración oral, poesía e humor. O venres 2 de outubro, Sue Moreno presentará 5.0 na Praza da Cruz Vermella (18.00h), un espectáculo que mestura circo, música e danza para reflexionar sobre o paso do tempo. Pola súa banda, Zirko Txosko achegará Tavole á Praza do Concello (19.30h), un circo contemporáneo para todos os públicos.
Na Rúa dos Contos, o venres 2 de outubro, Carmen Conde presentará O que non estaba escrito (21.00h, Café Colón), unha proposta de narración oral baseada en historias recollidas por Galicia. A noite continuará ás 23.00h no Casino 1889 con ‘Poesía acústica’ de Lúa Mosquetera, que transita entre o spoken word e a poesía rapeada.
O sábado 3, a Rúa dos Contos acollerá a estrea absoluta de As ben dadas, de Atenea García (23.00h, Salón Social do Pazo da Cultura), que percorre as disidencias sexuais en Galicia a través da narración oral. A programación desta segunda semana rematará o domingo 4 de outubro coa comedia irreverente A historia vaxenial, de Raquel Nogueira e Iván Marcos (20.00h, Auditorio do Pazo da Cultura).
As últimas entradas e bonos para o OTNI do FIOT, con prezos desde 5 euros, poden adquirirse a través da plataforma en liña Ataquilla.com.
