Un dos pratos fortes da semana será a estrea en Galicia de Libres!!!, montaxe escrita por Esther F. Carrodeguas e dirixida polo Premio Nacional de Teatro Andrés Lima, que se poderá ver o sábado 17 de outubro no Auditorio do Pazo da Cultura. A obra, protagonizada por Alba Flores, recupera a memoria da organización anarcosindicalista Mujeres Libres e reivindica a potencia da utopía alegre nun cabaré anarcosicalíptico que mestura humor, música e cancións.
A programación tamén inclúe a estrea galega de Cosas pequeñas, de PSiRC, unha proposta multidisciplinar que combina circo contemporáneo, teatro de obxectos e poesía visual, e Doce metros cuadrados de piel, de La Rueda Teatro Social, unha creación de teatro comunitario e interxeracional. O festival complétase con novas propostas do OTNI, o FIOTeen, o Certame de Micro-Escenas M² e o FIOT en Ruta, ademais de obradoiros e unha homenaxe a Manuel Lourenzo.
O xoves 15 de outubro, o ciclo OTNI presentará o ‘work in progress’ Asoballada por fentos, do artista e investigador galego Álvaro Corral Cid, unha revisión crítica da memoria folclórica galega e a súa instrumentalización durante o franquismo. A entrada é gratuíta.
O venres 16 de outubro, chegará Cosas pequeñas, de PSiRC, que explora a condición humana fronte ao avance das máquinas e os algoritmos a través do circo contemporáneo e a poesía visual.
O sábado 17 de outubro, o X Certame de Micro-Escenas M² presentará dúas novas pezas finalistas en estrea absoluta: Fogar, de La Tercera, no Xardín Rosalía de Castro, e A casa do avó, de Candil Teatro, na tenda Buy & Sell.
Tamén o sábado 17, inaugurarase a exposición Manuel Lourenzo. A pegada que continúa, unha homenaxe a esta figura fundamental do teatro galego, no vestíbulo do Pazo da Cultura.
O mércores 14 de outubro, o FIOTeen ofrecerá a función escolar de Caballito de mar, de Flyhard Produccions, que aborda a diversidade, os afectos e a liberdade de ser, seguida dun encontro coa compañía.
O domingo 18 de outubro, o FIOT en Ruta presentará As aventuras de Nabiza Girl, de Isabel Risco, e Doce metros cuadrados de piel, de La Rueda Teatro Social, que exploran os modelos sociais e a identidade ao longo das distintas etapas da vida.
O festival destaca a gran resposta do público, con máis do 90% do aforo esgotado para moitas das súas propostas, e lembra que aínda poden aparecer localidades adicionais na billeteira do Pazo da Cultura.
