O Festival Internacional Outono de Teatro de Carballo (FIOT) celebra a súa 35ª edición cunha programación que se estende ata o 31 de outubro. A primeira semana do festival, que comezou hoxe mércores, inclúe propostas de circo, humor e narración oral.
O gran atractivo desta primeira semana será a presenza de Carles Sans, quen presentará o seu monólogo ¡Por fin me voy! no Auditorio do Pazo da Cultura o sábado 26 de setembro ás 20:00 horas. O espectáculo marca a súa despedida dos escenarios despois de catro décadas e media de carreira.
Baixo o lema “Cando todo cae, ven ao teatro”, o FIOT35 achega 43 espectáculos, con 8 estreas absolutas e 9 en Galicia, procedentes de España e Portugal. A programación divídese en diferentes ciclos como Programa de Sala, OTNI, Rúa dos Contos, Teatro de Rúa, FIOT en Ruta, Micro-escenas M², FIOTeen e FIOTiño.
Carles Sans, coñecido pola súa xestualidade e humor característicos con Tricicle, emprega agora a palabra con maior protagonismo en ¡Por fin me voy!. O espectáculo, que parte da chegada á xubilación, explora as contradicións e fantasías da vida do pensionista cun ritmo vertixinoso de gargalladas.
A presenza de Sans enmárcase na Rúa dos Contos, ciclo pioneiro de narración oral do festival, que busca levar a palabra e o humor a espazos cotiáns de Carballo.
A programación desta semana tamén inclúe Hamelin de Fran Rei na Residencia de Maiores (23 de setembro), Laretadas de Josito Porto no Mesón do Pulpo (24 de setembro), e o espectáculo de circo Fins al Cel de Spinish Circo na Praza do Concello (25 de setembro).
O sábado 26, ademais de Carles Sans, a Rúa dos Contos presenta Cancionólogos de Daniel Higiénico no O Patacón. O domingo 27, Sobria e Serena pechará a primeira semana coa comedia galega O chou no Auditorio do Pazo da Cultura.
