O conselleiro de Medio Ambiente e Cambio Climático, Nicolás Vázquez Iglesias, visitou hoxe o Carballo do Bosque do Banquete de Conxo, en Santiago de Compostela, con motivo da súa inclusión no Catálogo de árbores senlleiras. A Xunta de Galicia publica hoxe esta incorporación no Diario Oficial de Galicia.
Segundo explicou o conselleiro, acompañado da delegada territorial da Xunta na Coruña, Belén do Campo, a inclusión deste exemplar responde aos seus valores históricos e culturais. O carballo atópase na carballeira onde se celebrou o histórico Banquete de Conxo o 2 de marzo de 1856, un acto simbólico de igualdade e fraternidade entre estudantes e artesáns.
Vázquez Iglesias subliñou que "protexer esta árbore é tamén conservar unha parte da memoria colectiva de Galicia e transmitir o noso legado ás vindeiras xeracións". O catálogo galego de árbores senlleiras é unha ferramenta pública en constante actualización, aberta a propostas de propietarios, administracións e entidades.
O conselleiro tamén puxo en valor o traballo do Comité de árbores senlleiras, órgano consultivo integrado por representantes das universidades galegas, consellerías e expertos, encargado de avaliar as inclusións e exclusións de exemplares.
Actualmente, o Catálogo galego de árbores senlleiras conta con 207 elementos (159 exemplares e 48 formacións arbóreas) de 85 especies diferentes. A inclusión de exemplares baséase en características excepcionais de porte, idade, rareza, interese histórico, cultural, científico, educativo, estético ou paisaxístico.
