A asociación Salvemos Cabana, tras analizar a documentación ambiental do proxecto, considera que a localización e as características da planta de biogás son incompatibles coa protección e conservación do río Anllóns, ao que describen como o "verdadeiro eixo vertebrador da comarca de Bergantiños".
“"A parcela escollida para a instalación linda ao sur coa canle do Anllóns, situando unha actividade industrial de xestión masiva de residuos nunha contorna de elevada sensibilidade ambiental, o que suporía un risco inasumible para o medio hídrico e para o equilibrio ecolóxico do río."
A planta proxectada prevé tratar ata 63.500 toneladas anuais de residuos, incluíndo xurros, lodos industriais e residuos de matadoiro, materiais que a asociación considera de "elevado potencial de afección ambiental". Ademais, estímase a xeración de 50.947 metros cúbicos anuais de augas residuais industriais.
A organización subliña que calquera fallo estrutural, vertido accidental, erro humano ou episodio de choivas intensas podería provocar unha contaminación directa das augas superficiais do río Anllóns e afectar gravemente a rede hidrográfica de Galicia-Costa. Tamén se mencionan outros impactos negativos como o incremento do tráfico pesado, estimado entre 25 e 30 camións diarios, a emisión de olores e contaminantes atmosféricos, e a degradación da paisaxe rural e da calidade de vida das poboacións próximas.
A proximidade da planta á Mámoa de Chousa Grande, un espazo protexido, e os riscos inherentes ao almacenamento de biogás a alta presión nunha zona catalogada como de alto risco de incendios forestais, son outros dos puntos de preocupación. Por todo isto, a asociación considera o proxecto incompatible co modelo de desenvolvemento rural e coa preservación ambiental da contorna do Anllóns.
“"A defensa do río Anllóns, cuxa canle abraza ao mar en Cabana de Bergantiños, debe ser un criterio prioritario en calquera decisión administrativa. Por iso hai que demandar á Xunta unha actuación responsable, preventiva e coherente coa protección efectiva do patrimonio cultural galego e o sentir maioritario da poboación."
