O conselleiro de Sanidade, Antonio Gómez Caamaño, destacou hoxe o investimento da Xunta de máis de 410.000 euros, destinado a reforzar a capacidade diagnóstica do Hospital de Barbanza cunha nova sala de radioloxía e novos ecógrafos para urxencias e dermatoloxía.
Durante a visita, o conselleiro puido coñecer de primeira man o novo equipamento e comprobar como os investimentos da Xunta se transforman en mellores medios para os profesionais e nunha atención máis precisa e de maior calidade para os pacientes.
Entre as melloras atópase a nova sala de radioloxía de alta tecnoloxía, cun investimento de case 250.000 euros, que mellora a calidade da imaxe, aumenta a precisión diagnóstica, reduce a radiación e incorpora ferramentas baseadas en intelixencia artificial, ademais de tecnoloxía de imaxe 3D. Esta sala permite realizar ao redor de 2.100 estudos cada ano.
Complementariamente, un equipo de radioloxía portátil, cun investimento de máis de 111.000 euros, facilita a atención a persoas con mobilidade reducida, gañando en axilidade e precisión diagnóstica.
O servizo de urxencias tamén se veu reforzado cun novo ecógrafo portátil, grazas a un investimento de 29.000 euros, mellorando notablemente a súa capacidade diagnóstica.
Ademais, hai dous meses incorporouse un novo ecógrafo de última xeración para o servizo de dermatoloxía, cun investimento de máis de 21.000 euros. Este equipo permite unha avaliación máis precisa e inmediata das lesións cutáneas e subcutáneas, mellorando a planificación dos tratamentos.
O conselleiro puxo en valor a actividade do servizo de dermatoloxía, que o pasado ano realizou preto de 8.200 consultas e máis de 8.400 citas programadas, ademais de 300 intervencións.
Estes investimentos forman parte da estratexia do Executivo galego para modernizar o equipamento sanitario dos hospitais comarcais e achegar sanidade de vangarda a todo o territorio. A Xunta tamén destacou a recente posta en funcionamento dunha nova ambulancia de soporte vital avanzado con base neste centro, que mellora a atención ás urxencias de máis de 75.000 veciños.
Así mesmo, avánzase no futuro hospital de día oncohematolóxico, que achegará tratamentos especializados sen necesidade de desprazamento a outros hospitais.
