A posta en marcha desta nova ambulancia, a primeira da que dispón a comarca, foi anunciada este mércores polo conselleiro de Sanidade, Antonio Gómez Caamaño. O vehículo terá a súa base inicial no hospital comarcal do Barbanza, en Ribeira.
O equipo da ambulancia estará formado por un profesional médico, un de enfermería e un técnico en emerxencias sanitarias, e contará con equipamento avanzado para atender as urxencias na área que inclúe Ribeira, Rianxo, Boiro, A Pobra e O Porto do Son.
O conselleiro de Sanidade xustificou a necesidade deste novo recurso polo volume de poboación e o incremento da actividade asistencial na comarca, que tamén concentra varios polígonos industriais. En 2024, o 061 realizou preto de 7.000 asistencias no Barbanza, atendendo máis de 8.500 pacientes, a metade dos cales precisaron traslado hospitalario.
Ademais, o hospital do Barbanza efectuou máis de 1.700 traslados secundarios ao Complexo Hospitalario Universitario de Santiago de Compostela, case o 40% dos cales requiriron unha ambulancia medicalizada.
A Xunta comprometeuse co Concello de Ribeira, o persoal do hospital e os colectivos empresariais da zona a poñer en servizo este ano a nova ambulancia, como parte do aumento progresivo da rede de ambulancias do 061.
