A ambulancia, posta en marcha pola Xunta, destaca polas súas actuacións en oito traslados secundarios de pacientes ao Complexo Hospitalario Universitario de Santiago con patoloxías tempo-dependentes.
Dous deses traslados corresponderon a activacións do programa Progaliam, o protocolo do Servizo Galego de Saúde para resposta rápida ante o infarto agudo de miocardio. Tamén se realizou un traslado por shock cardioxénico, unha situación de extrema gravidade.
O dispositivo tamén interveu na derivación de pacientes con outras patoloxías críticas como hemorraxia subaracnoidea masiva, ictus hemorráxico ou derrame pleural masivo.
Os motivos de asistencia máis frecuentes foron alteracións do nivel de consciencia (21 intervencións), cadros de disnea ou dificultade respiratoria (9), e traslados por indicación hospitalaria (8). Tamén se atenderon accidentes de tráfico, cadros de dor, caídas e outras urxencias.
A maior parte da actividade concentrouse en Ribeira (40 mobilizacións), seguido do Porto do Son (11), A Pobra do Caramiñal (10), Boiro (4), Rianxo (2) e unha asistencia en Dodro.
No que respecta aos destinos, realizáronse 43 traslados ao Hospital Público de Barbanza. Outras 14 actuacións resolvéronse no lugar da asistencia e o resto a outros centros hospitalarios.
Este novo recurso asistencial, con base no Hospital Público de Barbanza, dá cobertura a máis de 75.000 veciños dos concellos de Ribeira, A Pobra do Caramiñal, O Porto do Son, Boiro e Rianxo.
