Esta suspensión, cualificada como unha "mostra de boa fe e diálogo", prodúcese despois de que a plataforma fose convocada a unha reunión coa dirección do complexo hospitalario e cos responsables da área sanitaria de Santiago-Barbanza. O encontro está previsto para este venres, 8 de maio, ás 16:30 horas.
A decisión de suspender a protesta chega tamén despois de que a plataforma desafiase a xerencia da área sanitaria ao manter a actuación do actor Quico Cadaval. Este evento tivo lugar o pasado luns pola tarde, a pesar das advertencias do Sergas sobre os riscos e a vulneración da normativa que supoñen os eventos públicos sen control en centros sanitarios.
“"Fixeron falta 823 días para que a administración sanitaria se dignase a responder ás diversas peticións de reunión que se lles fixeron."
A pesar da convocatoria, o colectivo subliña que a asistencia á reunión non implica unha renuncia ás súas "reivindicacións históricas". A plataforma insiste na necesidade de abordar con transparencia a cuestión das listas de espera, poñer fin á precarización do persoal sanitario e dotar de recursos humanos, técnicos e económicos aos centros de saúde e hospitais da comarca do Barbanza e de toda Galicia.
A plataforma xa recolleu máis de 1.700 sinaturas de apoio ás súas demandas e continuará organizando concentracións. Entre as próximas mobilizacións, destacan as previstas para este martes en Rianxo, para reclamar a apertura do PAC 24 horas e o reforzo de Pediatría, e o venres 8 de maio en Aguiño e A Pobra, para esixir a cobertura do persoal sanitario e a apertura dos PAC polas tardes.
