O presidente da Xunta, Alfonso Rueda, anunciou hoxe que o Goberno galego lanzará unha orde de axudas que superará os 3,6 millóns de euros para apoiar directamente aos agricultores e gandeiros galegos fronte ao aumento dos custos de produción, especialmente no referido ao gasóleo agrícola e aos fertilizantes. A visita realizouse ás instalacións da Granxa Doroña SAT, en Arzúa, provedora da planta de Nestlé en Pontecesures.
Estas axudas, que contarán cunha achega de 1,6 millóns da Comisión Europea complementada con 2 millóns adicionais da Xunta, están destinadas a agricultores dados de alta na Seguridade Social como autónomos na actividade agraria que obteñan dela, polo menos, o 25% dos seus ingresos. A achega será directa por hectárea de superficie agraria útil.
O titular da Xunta, acompañado pola conselleira do Medio Rural, María José Gómez, explicou que a tramitación será simplificada e que os apoios "aboaranse antes de que remate o ano" para proporcionar liquidez directa aos profesionais do campo. Rueda incidiu en que garantir a estabilidade e a rendibilidade das explotacións é imprescindible para asegurar a remuda xeracional no rural e fomentar que a mocidade aposte polo sector primario, "cada vez máis modernas pero sen perder esencias, rendibles, sostibles, coidando o medio ambiente e facendo avanzar a Galicia".
Alfonso Rueda puxo de manifesto a fortaleza do sector lácteo galego, lembrando que a comunidade concentra máis da metade das explotacións de España, produce o 42% do leite do conxunto do Estado e figura entre as dez rexións punteiras en Europa. Destacou tamén a relevancia das alianzas estratéxicas entre produtores, distribución e industria agroalimentaria, como a colaboración de grandes firmas como Nestlé con granxas locais para avanzar cara un modelo de produción máis sostible, apostando pola redución de emisións, a agricultura rexenerativa e a protección da biodiversidade.
Esta cooperación permite que máis do 75% do leite producido en Galicia sexa transformado na propia comunidade, consolidando a cadea de valor e fixando poboación no rural. "Xa sabemos que temos a mellor materia prima, o leite galego é Galicia Calidade, pero se somos capaces de transformala e de darlle máis valor, iso supón máis rendibilidade, máis vida, máis aposta e máis futuro", asegurou.
