A Concellería de Igualdade do Concello de Arzúa presentou a programación de novembro da Casa das Mulleres, coa que se busca consolidar este espazo como un lugar de encontro, participación e apoio mutuo para as mulleres do municipio. O calendario deste mes combina as actividades habituais cunha programación especial arredor do 25 de novembro, Día Internacional para a Eliminación da Violencia contra as Mulleres.
A técnica de Igualdade, Sabela Losada, explicou que a intención é que a Casa das Mulleres sexa «un espazo propio para todas as mulleres de Arzúa, no que poidan sentirse seguras e acompañadas». A programación de novembro inclúe encontros sobre mulleres migrantes e violencias invisibilizadas, asesoramento xurídico e novas propostas formativas.
A campaña municipal polo 25N, baixo a mensaxe «Violencia tamén é mentir», céntrase na banalización e negación da violencia de xénero. A concelleira de Igualdade, Lucía López, sinalou que estes discursos «invisibilizan as vítimas, alimentan os prexuízos machistas e dificultan que avancemos cara á igualdade real».
López advertiu que negar esta realidade ten consecuencias directas para as vítimas e que é «especialmente grave cando sabemos que hai mulleres que precisan protección e acompañamento». A campaña tamén aborda o acoso dixital e os deepfakes.
A programación de novembro inclúe actividades como a excursión a Lugo «Tecendo irmandade fronte á violencia contra as mulleres» o 7 de novembro, xornadas sobre violencia obstétrica o 19 de novembro, e obradoiros nos centros educativos. O 24 de novembro asinaranse convenios interinstitucionais e o 25 de novembro celebrarase o acto institucional.
